Smarties

وصل جثمان دلال حطوه بالمصلى ... قالوا حق الحريم منو يبي يشوفها ؟؟؟ محد تحرك ولا احد تكلم ؟؟؟ قالولنا مكفنينها ماراح يبين ويهها ... اهني تشجعت و رحت على طول كنت بروحي معاها ... أول وحدة دشت عليها من الحريم أنا ... شفت جسدها و مو مصدقة هاذي دلول ... قعدت يمها وانا ارجف حطيت ايدي على راسها و قريت الفاتحة و طلبتلها الرحمة ... بعدها دشو الحريم علينا ... اختي قعدت يمي و تبجي و انا اقولها لأ هاذي مو دلول ... هاذي مو دلول ... و الحريم يقولون لي لا تبجين طلبيلها الرحمة لا تبجين ... ( شلون ما أبجي هاذي دلول مكفنة و ما تبوني أبجي )

صار وقت الجنازة شالو النعش على أكتافهم و العالم كله يمشي بجنازتها ... كنت من آخر الناس اللي يمشون وراها ... امشي و أشوف هالناس و اسأل بيني و بين نفسي: احنا يايين ندفن منو ؟؟ ندفن دلال ؟؟؟ لألأ مو معقولة دلال صغيرة أكيد أحنا يايين ندفن شخص كبير بالعمر ....

وصلوا إلى قبرها ... ما تحملت اقعد بين الحريم ... رحت مع بنت خالتي قعدت بين القبور ابي اكون قريبة منها ... اللي معور قلبي اني ادري انها تمشي بينا و تقول انا كاني ما مت و محد يسمعها و تشوف كل اللي حواليها واهي مستغربة ليش يبجون انا ما مت .... بعد عمري يا دلال

حطو جسدها باللحد ... غطوها بالتراب و ابتدأت مراسم تلقين الميت :
" اسمعي يا دلال يا بنت بسام
هل أنت على العهد الذي فارقتنا عليه، من شهادة أن لا اله إلا الله وحده لا شريك له، وان محمد صلى الله عليه واله عبده ورسوله وسيد النبيين وخاتم المرسلين، وان عليا أمير المؤمنين وسيد الوصيين وإمام افترض الله طاعته على العالمين، وان الحسن والحسين وعلي بن الحسين ومحمد بن علي وجعفر ابن محمد و موسى بن جعفر و علي بن موسى و محمد بن علي و علي بن محمد و الحسن بن علي والقائم الحجة المهدي صلوات الله عليهم أئمة المؤمنين وحجج الله على الخلق أجمعين وأئمتك أئمة هدى أبرار

يا دلال بنت بسام
إذا أتاك الملكان المقربان، رسولين من عند الله تبارك وتعالى، وسألاك عن ربك، وعن نبيك وعن دينك وعن كتابك وعن قبلتك وعن أئمتك، فلا تخفي وقولي في جوابهما، الله جل جلاله ربي ومحمد صلى الله عليه واله نبيي، والإسلام ديني، والقرآن كتابي، والكعبة قبلتي، وأمير المؤمنين علي ابن أبي طالب عليه السلام أمامي، والحسن بن علي المجتبى عليه السلام أمامي، و الحسين بن علي الشهيد عليه السلام أمامي، و علي بن الحسين السجاد عليه السلام أمامي، و محمد بن علي الباقر عليه السلام أمامي، و جعفر بن محمد الصادق عليه السلام أمامي، و موسى ابن جعفر الكاظم عليه السلام أمامي، و علي بن موسى الرضا عليه السلام أمامي، و ومحمد بن علي الجواد عليه السلام أمامي، و علي بن محمد الهادي عليه السلام أمامي، و الحسن ابن علي العسكري عليه السلام أمامي، و القائم الحجة عليه السلام أمامي

اشهد أن الموت حق، وسؤال منكر ونكير حق، والبعث حق، والنشور حق، والصراط حق، والميزان حق، وتطاير الكتب حق، و الجنة حق

افهمت يا دلال
ثبتك الله بالقول الثابت هداك الله الى صراط مستقيم، عرف الله بينك وبين اوليائك، في مستقر رحمته

اللهم جاف الأرض عن جنبيها، واصعد بروحها إليك، ولقها منك برهانا اللهم عفوك عفوك "




لا حول ولا قوة إلا بالله


وانا قاعدة بين القبور لفت نظري قبر و في عايلة متجمعين حوالينه .... قريت الاسم .... انصدمت قلت لأ مو معقولة .... ( علي زكريا ) العمر 21 ... زاد بكائي
رحت عندهم سلمت عليهم و عزيتهم و قريت الفاتحة على روحة ... سألتني ... انتي تعرفين علي؟ قلتلها لأ بس كان معاي بالجامعة سمعت عنه ... جان تقولي يمه علي كـــــــــان معاج بالجامعة الحين علي تحت التراب نفس دلال...
قلتلها دلال انذبحت ما ماتت موته عادية
قالتلي حتى انا ولدي انذبح صارلي شهر وانا ابجي عليه مو قادرة على فراقة ...
سألتني عن دلال شنو تصيرلج ؟؟ و جم عمرها؟؟ قلتلها انا رفيجتها من عمر معاها ... دلال 22 سنة توها متخرجة من الجامعة و متوظفة ....
قالتلي انا ولدي علي كان المفروض يتخرج هالسنة ... ولدي مات بيوم عيدميلاده .... ولدي معرس و هذي عروسته (واهي تأشر على قبر دلال) .... يمه "علي" "دلال" عروستك يايتلك اليوم دير بالك عليها .....
حبيت راسها و قلتلها عظم الله اجرج و ان شاء الله تشوفينه بالجنة


دفنوا دلال تحت التراب .... رحت حق قبرها ماني مصدقة دلول تحت التراب طحت على القبر وانا ابجي

و أمها تبجي و تقول: دلال يمه طلعي مكانج مو اهني مكانج مو تحت التراب ... مكانج بالبيت اخوانج ناطرينج ردي البيت ... يمه لا تخافين انتي مو بروحج احنا كلنا معاج ... يمه لا تخافين

و أم علي تقول: دلال انا أم علي ... كاهو علي اهني يمج ... دلال سلمي على "علي" وايد و قوليله امك تعبانه تعبانه حيل و كل يوم تنام بغرفتك دلال انتي الحين قريبة على "علي" إذا شفتيه قوليله امك تسلم عليك ...... ولدي مات بيوم عيدميلاده ... اتصدقون ولدي تحت التراب ؟؟ اتصدقون هالبنية تقول كان معاي بالجامعة ؟؟ وينه علي وينه !!!!!!!

خفت الزحمة اللي كانت عالقبر ظليت فترة طويلة افكر ... الحين إذا ابي اشوف دلول ما اروح بيتهم !! اييلها المقبرة !! معقولة ؟؟؟ ... امي شالتني من على القبر و بالغصب امشي وانا عيني على قبرها مو هاين علي اخليها بروحها

طلعنا من المقبرة صار هدوء .... غمضت عيني بالسيارة و اتذكر كل اللحظات اللي كنا فيها مع بعض ... دلال كانت اختي ... كل يوم الصبح آخذها من البيت و نروح الجامعة و نرجع مع بعض ... يوم اهي تاخذني من البيت و يوم أنا آخذها ... كنت دايما اقولها تعالي معاي الكلية لا تروحين بسيارتج الطريج طويل خلينا نقزرها سوالف ..... و هذا غير الطلعات و المجمعات و المطاعم و الدراسة مع بعض ... الله يرحمها كانت شاطرة بدراستها و دايما تساعدني بالدراسة ....

رجعت البيت و التلفون ما سكت الكل يعزيني ... أهلي ، رفيجاتي ، الناس اللي ما يعرفونها .... و غير المسجات اللي لي هالحزة توصلني

اي يـــا نــاس دلال ماتت .... دلال ماتت

--------------------------------------------------------------------------------------------------


إنا لله و إنا إليه راجعون


رحم الله من قرأ سورة الفاتحة على روح المرحومة:

دلال بسام النقي 

 قبلها الصلوات على محمد وآل محمد


اللهم صلي على محمد و آل محمد

(( بِسْمِ اللّهِ الرَّحْمـَنِ الرَّحِيمِ الْحَمْدُ للّهِ رَبِّ الْعَالَمِينَ الرَّحْمـنِ الرَّحِيمِ مَـالِكِ يَوْمِ الدِّينِ إِيَّاكَ نَعْبُدُ وإِيَّاكَ نَسْتَعِينُ اهدِنَــــا الصِّرَاطَ المُستَقِيمَ صِرَاطَ الَّذِينَ أَنعَمتَ عَلَيهِمْ غَيرِ المَغضُوبِ عَلَيهِمْ وَلاَ الضَّالِّينَ ))

---------------------------------------------------

يا ناس لا تنقلون الإشاعات دلال لا متزوجة ولا مخطوبة ولا الخدامة حارقة شيلتها !!! بسكم اشاعات ترحموا عليها و طلبولها المغفرة ...

الاثنين 14-5-2007

شريفة اليوسف